Adpfend in Bayern

Adpfend (aus einem Schulaufsatz)
Der Adpfend ist de schönste Zeit im Winta.
De meisten Leit habm im Winta a Grippe. De is mit Fieber.Mir homa oane, owa des is mit Beleichtung und man schreibts mit 'K'.
Drei Wocha bevor’s Christkindl kimmt, stellt da Pappa de Kripp’m im Wohnzimma auf und mei kloane Schwesta und i derma mithelfa.
Kripp’m san langweile. Owa de unser ned, wai mia habm mordstolle Figurn drin. I hob amoi an Josef und s’ Christkindl auf’n Ofa g’stellt, dass ses sche warm habm - und des war eahna z’hoass.
S’ Christkindl is schwarz worn und an Josef hats in lauta Trümmer zrissn. Oa Fuaß vo eahm is bis in Platzldoag g’flogn und des war koa schöna Anblick. Mei Mama hat mi g’schimpft und g’sogt, das ned amoi de Heiligen vor meiner Blödheit sicha sand.
Wenn d’Maria ohne Mo und ohne Kind herumsteht, schaugst ned guat aus.
Owa i hob Gott seidank vej Figurn in meina Spuikistn und da Josef is jetzt da Donald Duck. Ois Christkindl woit i an Asterix nehma, wie der so kloa is, dass er in den Fuadertrog paßt. Owa da hot d’Mama g’sogt, ma ko doch ois Christkindl koan Asterix hernehma, do is ja no as verbrennte Christkindl bessa. Es is zwar schwarz, owa immerhin no a Christkindl.
Hintan Christkindl stehnan zwoa Oxn, a Esl, a Nilpferd und a Brontosaurier. Des Nilpferd und den Saurier hob i hig’stellt, wai da Ox und da Esl warn ma z’langweile.
Links neba den Stoi kemman grod de heilign drei König daher. Oa König is an Papa im letzten Adpfend beim Putzn owe g’foin und er war total hi. Jetzt hama nur mehr zwoa heilige Könige und an heiligen Batman als Ersatz.
Normal homand de heiligen Könige an haufa Zeig für’s Christkindl dabei, nämlich Goid, Weihrauch und Pürree - oda so ähnlich...
Vo den unsan hod oana anstatt Goid a Kaugummipapierl dabei, des glänzt so schö.
Da anda hot a Marlboro in da Hand, wai ma koan Weihrauch ham. Owa de Marlboro raucht a schön, wenn mas ozündt.
Da heilige Batman hat a Pistoin dabei. Des is zwar koa G’schenk füa a Christkindl, owa damit konn er’s vorm Saurier beschütz’n.
Hinta dene drei Heilige san a por rotheitige Indiana und a kaasiga Engl. Den Engl is a Fuaß obbrocha, drum haman auf a Motorradl g’setzt, dass er si leichta tuat.
Mit’n Motorradl kann er fahrn, wenn er grod net fliagt.
Rechts neban Stoi habma a Rotkäppchen hig’stellt. Si hod a Pizza und drei Weißbier füa d’Oma dabei. An Woif hama ned, drum lurt unta am Baam a Bummerl ois Ersatzwoif viara.
Mehr steht in unsara Kripp’m ned drin, owa des reicht a.
Auf d’Nacht schoid mas Licht ei und dann is unsa Kripp’m erscht so richte schö.
Mia sitz ma olle do und sing ma Liarda vom Adpfend. Manche gfoima, owe de meistn san ma z’luasat.
Mei Opa hot ma amoi a Gedicht vom Apfend lernt du des geht so:
Adpfend, Adpfend, da Bärwurz brennt, erscht dringst oan, dann zwoa, drei, vier,
dann hauts’te mit dem Hirn an d’Tür.
Obwohl des Gedicht recht sche is, hot d’Muata g’sogt, das i mir’s ned merka deaf.
Bis ma schaut, is da Adpfend voabei und d’Weihnacht a und mit dem Johr geht’s dahi.
D’Geschenk san auspackt und man griagt vor Ostern nixmehr, höx’tns an Geburtstag.
Owa oans is gwiß - da Adpfend kimmt olaweit wieda!